İmişlidə şəhid ailələrinin yaşadıqları kəndlər asfaltlandı - Fotolar

İmişli rayonunda Azərbaycanın ərazi bütövlüyü uğrunda qəhrəmancasına şəhid olan sakinlərin adlarının əbədiləşdirilməsi, onların əziz xatirələrini daim yaşatmaq, ailələrinə diqqət və qayğı göstərmək, problemlərinin həlli istiqamətində təxirəsalınmaz tədbirlərin həyata keçirilməsi xüsusi diqqətdə saxlanılır.

“Qafqazinfo” xəbər verir ki, görülən tədbirlər çərçivəsində torpaqlarımızın düşmən tapdağından azad olunmasında şücaət göstərərək Vətən müharibəsində şəhidlik zirvəsinə ucalan Amil Səfərlinin ailə üzvlərinin yaşadığı Çahar kəndində, Şaiq Teymurovun ailə üzvlərinin yaşadığı Aranlı kəndində, Asim Abbasovun ailə üzvlərinin yaşadığı Hacırüstəmli kəndində, Elçin Quliyevin ailə üzvlərinin yaşadığı Məzrəli kəndində, Əmrah Səfərlinin ailə üzvlərinin yaşadığı Göbəktala kəndində, Nemət Həsənovun və aprel döyüşləri şəhidi Cavid Dədəkişiyevin ailə üzvlərinin yaşadıqları Qaralar kəndində, həmçinin Cavadxanlı kənd məscidinə və qəbiristanlığına gedən yolda əsaslı təmir işləri aparılaraq 18600 kv. m yeni asfalt örtüyü salınıb. Sözügedən yollarda tikinti norma və standartlarına uyğun olaraq aparılan əsaslı təmir işləri tez bir zamanda yekunlaşdırılıb və bu yolla hərəkət zamanı yaranmış çətinliklər aradan qaldırılıb.

Qeyd edək ki, hazırda İmişli rayonunda şəhid ailələrinin yaşadıqları ərazilərdə təmirsiz yolların asfaltlanması istiqamətində görülən işlər davam etdirilir.