Çində əhalinin sayı 1,39 milyon nəfər azalıb
- 17-01-2025, 13:04
- Dünya
“Report” xəbər verir ki, bu barədə Çinin Dövlət Statistika Bürosu açıqlama yayıb.
Ötən il Çində 9,54 milyon doğum və 10,93 milyon ölüm qeydə alınıb. Doğum və ölüm nisbətləri müvafiq olaraq mində 6,77 və 7,76 olub.
Büro ötən ilin sonuna ölkədə 719,09 milyon kişi (azalma 0,1%), 689,19 qadın olduğunu açıqlayıb. Ölkədə məşğulluq yaşındakı əhalinin (16-60 yaş arası) sayı 857,98 milyon nəfər təşkil edib ki, bu da ümumi əhali sayının 60,9 faizi deməkdir.
Çində demoqrafik böhranın digər məqamı isə əhalinin qocalması, yəni yaşlı insanların ümumi əhali sayındakı payının çoxalmasıdır. Ötən ilin sonuna yaşı 65-dən yuxarı olanların sayı isə 220,23 milyon nəfər (artım 1,6%) təşkil edib.
BMT-nin rəyinə əsasən, yaşı 65-dən yuxarı olanların sayı ümumi əhalinin sayının 14 faizindən çoxunu təşkil edərsə, həmin cəmiyyət "yaşlı cəmiyyət", bu rəqəm 20 faizdən çox olarsa "super yaşlı cəmiyyət" kimi xarakterizə olunur.
Qeyd edək ki, uzun illər dünyanın ən çox əhalisi olan ölkə ünvanını daşıyan Çində 2022-ci ildən əhali sayında azalma başlayıb. Üç il əvvəl Çin əhalisinin sayı son 60 ildə ilk dəfə olaraq 850 min nəfər azalıb. 2023-cü ildə bu rəqəm 2,08 milyon nəfər təşkil edib.
