Suriyada naməlum silahlılar mülki sakinləri öldürüblər

Suriyada hərbi geyimdə olan naməlum silahlılar Homs şəhəri yaxınlığında (Dəməşqdən 160 km aralıda) 13 mülki sakini qətlə yetiriblər.

“Report” xəbər verir ki, bu barədə “Elnashra” xəbər portalı məlumat yayıb.

Qeyd olunub ki, silahlılar daha 53 nəfəri girov götürərək naməlum istiqamətə aparıblar. Hadisə ilə əlaqədar Homs əyalətinin qubernatoru Əbdül Rəhman əl-Aama Məryəmin qəsəbəsinə baş çəkib və sakinlərə məlumat verib ki, hakimiyyət orqanları onların təhlükəsizliyini təmin etmək üçün bütün lazımi tədbirləri görüblər.

Onun sözlərinə görə, cinayəti törədən cinayətkarlar tapılaraq cəzalarını alacaqlar. Qubernator dini ziyarətgahlara edilən hücumları da pisləyib.

O bildirib ki, cinayətlər özlərini təhlükəsizlik qüvvələri kimi təqdim edən cinayətkar qrupun üzvləri tərəfindən törədilib: “Artıq bir neçə şübhəli saxlanılıb, qalanlarının axtarışı davam etdirilir. Hakimiyyət belə hadisələrin bir daha təkrar olunmayacağına zəmanət verir”.