Peru parlamenti cinayətkarlıqla əlaqəli vəziyyətə görə daxili işlər nazirinə etimadsızlıq göstərib

Peru Konqresi ölkənin təhlükəsizlik sahəsində vəziyyətin pisləşməsi səbəbindən daxili işlər naziri Xuan Xose Santivanyesi etimadsızlıq göstərib.

“Report” xəbər verir ki, bu barədə qanunverici orqanın sosial şəbəkə hesabında bildirilib.

“Milli nümayəndələr daxili işlər naziri Xuan Xose Santivanyesə qarşı siyasi məsuliyyətinə və ölkənin üzləşdiyi cinayətkarlıq dalğasına qarşı mübarizə apara bilməməsinə görə etimadsızlıq göstərilməsini təsdiqləyiblər. Qərar respublika prezidentinə çatdırılacaq”, – paylaşımda qeyd olunub.

Peru Prezidenti Dina Boluarte icra hakimiyyətinin parlamentin qərarına tabe olacağını təsdiqləsə də, hələlik yeni daxili işlər nazirinin adını açıqlamayıb.

“Mən bütün qəlbimlə nazir Santivanyesə təşəkkür etmək istəyirəm və əlbəttə ki, biz nazirliyin başına onun kimi cəsarətli başqa bir vətəndaşı təyin edəcəyik ki, o, təkcə mütəşəkkil və adi cinayətkarlığa qarşı mübarizə aparmasın, həm də qaranlıq qüvvələr tərəfindən ələ keçirilmiş nazirlikdə qayda-qanun yaratsın”, – dövlət başçısı artan hücumlar və qətllər səbəbindən Lima və Kalyao əyalətlərində fövqəladə vəziyyət rejiminin tətbiqinə həsr olunmuş hökumət iclasında söyləyib.

Qeyd edək ki, fövqəladə vəziyyət rejimi martın 17-də növbəti qalmaqallı qətldən sonra tətbiq edilib: qurban müğənni Paul Flores olub. Martın 16-da naməlum şəxslər musiqiçiyə və onun həmkarlarına çıxışdan sonra Peru paytaxtına avtobusla qayıdarkən hücum ediblər. Flores iki güllə yarası alıb və xəstəxanada vəfat edib.