Virtual döyüş real bıçaqlanmaya çevrildi: Dağıstanda qəribə hadisə
- 3-04-2025, 18:20
- Dünya
Oxu.Az-ın dagestan-news.net-ə istinadla verdiyi məlumata görə, hadisə üç dost - 27 yaşlı İbrahim, 24 yaşlı Mansur, həmçinin ümumi dostları Məhəmmədlə birlikdə video oyunlar və pivə ilə axşam keçirmək üçün toplaşdıqları zaman baş verib.
Bildirilir ki, onlar virtual futbolla başlasalar da, sonra populyar döyüş oyunu UFC-yə keçiblər. Lakin Mansur döyüşü uduzduqdan sonra vəziyyət gərginləşib. Alkoqolun təsiri altında olan uduzmuş şəxs İbrahimə içki şüşəsi ilə hücum edib, bunun cavabında yumruq zərbəsi alıb. Məhəmmədin dostları ayırmaq cəhdlərinə baxmayaraq, münaqişə küçədə əsl dava ilə nəticələnib. Orada hadisələr faciəli dönüş alıb - İbrahim Mansuru qarnından bıçaqlayıb.
Xoşbəxtlikdən, həyati vacib orqanlar zədələnməyib. Zərərçəkən təcili xəstəxanaya çatdırılıb. Hazırda o, həkimlərin nəzarəti altındadır və məlumatlara görə, dostuna qarşı iddiası yoxdur.
Buna baxmayaraq, İbrahimi ağır bədən xəsarəti yetirdiyinə görə şərti həbs cəzası gözləyir.
