Xırdalanda dəhşətli partlayışda ölən uşağın cəsədi aşkarlandı
- 26-01-2021, 16:16
- Hadisə
Abşeron rayonu, Xırdalan şəhəri, 27-ci məhəllədə yerləşən və partlayış nəticəsində uçqun baş vermiş ikimərtəbəli fərdi yaşayış evinin dağıntıları altından Fövqəladə Hallar Nazirliyinin qəza-xilasetmə qüvvələri tərəfindən daha bir nəfərin cəsədi çıxarılaraq aidiyyəti üzrə təhvil verilib.''Azad Səs'' Publika.az-a istinadən xəbər verir ki, bu barədə FHN məlumat yayıb.
Dağıntılar altında qalan şəxsin olmadığı nəzərə alınaraq, FHN tərəfindən axtarış-xilasetmə əməliyyatı sona çatdırılıb.
Qeyd edək ki, Nazirliyin qəza-xilasetmə qüvvələrinin operativ müdaxiləsi və peşəkar fəaliyyəti nəticəsində dağıntılar altından 6 nəfər xilas olunub, 2 nəfərin cəsədi tapılaraq aidiyyəti üzrə təhvil verilib.
Qeyd edək ki, meyiti tapılan şəxs 2012-ci il təvəllüdlü Musayeva Fatimə Vüsal qızıdır. Onun anası, 1988-ci il təvəllüdlü Aytən Musayevanın cəsədi dünən aşkarlanmışdı.
