KİV: Ermənistan NATO-nun yeni plasdarmıdır?
“Report” xəbər verir ki, bu barədə Rusiyanın NEWS.ru portalının analitik məqaləsində deyilir.
Bir gün əvvəl məlum olub ki, İrəvan KTMT təlimlərini boykot edir, lakin bir neçə həftə əvvəl ABŞ Ermənistan ərazisində “Eagle Partner 2024” manevrləri keçirdi. Hərbi analitiklər xəbərdarlıq edirlər ki, bu respublika Rusiyanı cənubdan təhdid edən NATO plasdarmına çevrilmək riski daşıyır.
Şoyqu Qərbin müdaxiləsi haqqında nə deyib
Şoyqu Bakıya çərşənbə axşamı gəlib, burada Azərbaycan Prezidenti İlham Əliyev və Təhlükəsizlik Şurasının katibi Ramil Usubov onu qəbul ediblər. "Ən vacib məsələlər müzakirə edildi", - Şoyqu görüşdən sonra deyib.
“Bu, əlbəttə ki, ilk növbədə Cənubi Qafqazda təhlükəsizlikdir. Bu, Ermənistanla 10-cu redaksiyası İrəvana verilmiş sülh sazişidir. Bu, əlbəttə ki, Qərbin prosesə müdaxilə etmək üçün çox fəal cəhdləridir", - o əlavə edib.
KTMT-nin təlimləri yenidən Ermənistansız keçiriləcək
Portal vurğulayıb ki, sonralar "3+3" adlandırılan Cənubi Qafqaz üzrə altı tərəfli əməkdaşlıq formatının təşəbbüsü ilə hələ dörd il əvvəl Azərbaycan və Türkiyə çıxış ediblər. Rusiya və İran bu fikri alqışladılar. Ermənistan da əvvəlcə təşəbbüsə qoşulub. Amma indi İrəvan tədricən onu Moskva ilə birləşdirən istənilən layihədən çıxır. Belə ki, bazar ertəsi Kollektiv Təhlükəsizlik Müqaviləsi Təşkilatının Katibliyi bəyan edib ki, Ermənistan KTMT-nin "Qarşılıqlı fəaliyyət-2024" kollektiv operativ reaksiya qüvvələrinin komanda-qərargah təlimlərində iştirakdan imtina edib. Təlimlər 3-15 sentyabrda Qırğızıstanda planlaşdırılıb.
Bazar ertəsi də məlum oldu ki, Ermənistan 14-16 avqust tarixlərində Novosibirskdə Rusiya Qvardiyasının himayəsi altında keçiriləcək KTMT-nin digər "Kobalt-2024" təlimlərini buraxacaq. Orada Belarus, Qazaxıstan, Tacikistan və Qırğızıstandan olan təhlükəsizlik qüvvələri qanunsuz silahlı birləşmələrin məhv edilməsi, habelə girovların azad edilməsi üçün birgə tədbirləri planlaşdırırlar.
Ermənistan son bir il ərzində KTMT-yə məhəl qoymur. Məsələn, ötən yay Belarusda manevrləri buraxıb. Bir az əvvəl İrəvan müttəfiqlərin ərazilərində təlimlər keçirməsini qadağan etmişdi, baxmayaraq ki, onları qəbul etmək növbəsi onun idi. Eyni zamanda, Ermənistan artıq ikinci ildir ki, ABŞ ilə “Eagle Partner” manevrləri keçirir və bunun üçün Amerika hərbçilərini dəvət edir. İyulun 15-24-də keçirilən təlimlərdə bu dəfə Ermənistan Silahlı Qüvvələrinin sülhməramlı briqadasının döyüşçüləri, həmçinin ABŞ-nin Quru Qoşunları və Kanzas Milli Qvardiyasından qonaqlar iştirak ediblər.
İrəvan Qərbə necə yönəldi
Ermənistanın Baş naziri Nikol Paşinyan bu ilin əvvəlindən KTMT-ni tənqid edir. Fevral ayında o, ölkənin təşkilata üzvlüyünün dondurulduğunu elan etdi və daha sonra İrəvan qurumun büdcəsinə üzvlük haqqı verməyi dayandırdı. Paşinyan hətta KTMT-nin üzvlərini Azərbaycanla birlikdə ermənilərə qarşı "müharibə planlaşdırdıqları" "köpük ittifaqı" adlandırdı. Nəhayət, iyun ayında parlamentdə çıxış edərək birbaşa respublikanı KTMT-dən çıxaracağına söz verdi, ancaq dərhal yox, lazım olduqda.
Paşinyan və Rusiyanı açıq şəkildə tənqid edir. Məsələn - o, ötən il, respublikasının Moskvadan asılılığını "strateji səhv" adlandırıb. O, eyni zamanda, Qərblə, hərbi sahədə sürətlə yaxınlaşmağa başlayıb.
İlham Əliyev Rusiyanın regionun təhlükəsizliyinə verdiyi töhfəni necə qiymətləndirib
Azərbaycanda qonşu respublikada revanşist əhval-ruhiyyənin artması regionu yeni silahlı münaqişə ilə təhdid etməsi ilə bağlı dəfələrlə narahatlıq ifadə olunub. İyul ayında Şuşada keçirilən İkinci Qlobal Media Forumunda çıxış edən Azərbaycan Prezidenti İlham Əliyev Paşinyanı Bakı ilə danışıqlarda "saxta tarixi povestlərdən uzaqlaşmağa və real yanaşma nümayiş etdirməyə" çağırıb. "Bunu Ermənistan, erməni diasporu və revanşist qüvvələr də anlamalıdır", - Azərbaycan lideri xəbərdarlıq edib.
Çərşənbə axşamı Şoyqu ilə görüşdə İlham Əliyev Moskva ilə münasibətləri mühüm təhlükəsizlik amili adlandırıb. "Azərbaycan-Rusiya münasibətlərinin bəzi qonşu ölkələr üçün də nümunə olduğunu deyən Prezident İlham Əliyev bunu Cənubi Qafqazda və daha geniş regionda təhlükəsizliyin mühüm amili kimi dəyərləndirib", - dövlət başçısının saytında bildirilir. Azərbaycan Prezidenti qeyd edib ki, iki ölkə arasında əlaqələr çox uğurla inkişaf edir. Şoyqu, öz növbəsində, regional təhlükəsizlik məsələlərində səmərəli qarşılıqlı əlaqəni vurğulayıb və Moskvanın Bakı ilə İrəvan arasında münasibətlərin normallaşdırılması prosesini dəstəklədiyini bildirib.
