"Ermənistanla böyük sülh müqaviləsi gözlənilir" - İBRAHİM NƏBİOĞLU
- 3-02-2021, 16:04
- Siyasət
“Bir müddət öncə Ayasofya ibadətə açılanda bir məqalə yazmışdım, adı da “Ayasfoya” idi. Həmin məqaləni yazanda gözümün önünə işğal altındakı torpaqlarımızı gətirmişdim. Bir gün bizim də Şuşa, Ağdam məscidində bayram namazı qılmağımızı arzu edirdim. Ağlıma da gəlməzdi ki, bu qədər tezliklə arzumuza çatarıq. Biz böyük qələbə qazanmışıq. Bu qələbəyə gedən yolda şəhidlərimiz oldu, həmçinin böyük maddi və mənəvi zərər gördük. Amma bütün bunlar bir kəndin belə azad edilməsinə dəyərdi. Çünki uğrunda vuruşduğumuz torpaqların hər qarşı vətəndir”.Bu sözləri Redaktor.az-a açıqlamasında tanınmış jurnalist İbrahim Nəbioğlu bildirib. O qeyd edib ki, qələbədən sonra yaşanan kiçik problemlər zamanla həllini tapacaq:
“Təbii ki, hər böyük qələbənin udanı və uduzanı olur. İndiki məqamda bu müharibədə udan və uduzan tərəflər məlumdur. Bəzi problemlər də var. Bu məsələlər ayrılıqda üzərində dayanılmalı, müzakirə edilməlidir. Amma məsələyə geniş prizmadan baxmaq lazımdır. Bu, Allahın bir lütfi idi ki, Azərbaycan Türkiyənin siyasi və mənəvi dəstəyi ilə çox düzgün bir zamanda torpaqlarımızın işğaldan azad edilməsinə qərar verdi. Dünayda baş verən proseslər bizim lehimizə cəryan edirdi ki, Azərbaycan hökuməti də bundan səmərəli şəkildə istifadə etsin. Hesab edirəm ki, bunların fonunda Azərbaycan öz yolu ilə getdi və gedir də. Bizim yolumuz nədən ibarətdir? Bu, ilk növbədə Türkiyə ilə türk dünyasının birləşməyidir. Şuşanın azad edilməsi nə qədər böyük bir hadisədirsə, Mehri dəhlizinin açılması da bir o qədər önəmlidir.
Bu dəhlizin açılması Azərbaycan və bütövlükdə türk dünyası üçün nə qədər lazımdırsa, ermənilər üçün on dəfə artıq lazımdır. Ermənistan dövlətinin, erməni xalqının mövcud olması üçün Mehri dəhlizi açılmalıdır. Onlar ağıllarını başlarına yığmalı, qonşularla normal münasibətlərin önəmini anlamalıdırlar. Başqa çıxış yolları yoxdur”.
İ.Nəbioğlu 44 günlük Vətən müharibəsindən sonra Ermənistanla gələcək münasibətlərdən, xüsusən nəqliyyat-kommunikasiya əlaqələrinin qurulmasından da danışıb:
“Nəqliyyat-kommunikasiya əlaqələrinin qurulması bölgənin inkişafına böyük təkan verəcək. Xüsusilə insanların Qarabağ bölgəsinə köçməsinə təkan verəcək. Həmçinin, Türkiyənin şərq əyalətlərində biznes inkişaf edəcək. Sadəcə, xalqımız bir qədər səbrli olmalıdır, hadislərin sonrakı inkişafını gözləməlidir”.
İ.Nəbioğlu son günlər erməni mediasında iki ölkə rəhbərlərinin yeni sənəd imzalayacağı haqqında xəbərləri də şərh edib:
“Bilirsiniz ki, uzun müddət Türkiyədə konsul, Qara Dəniz İqtisadi Əməkdaşlıq Təşkilatında daimi nümayəndə olmuşam. Türkiyənin siyasi və hərbi elitası ilə əlaqələrim var. Lakin mən belə bir sənədin hazırlanması haqda heç bir məlumata malik deyiləm. Amma bildiyim çox dəqiq bir məsələ var, 9 noyabrda imzalanan bəyanat atəşkəs anlaşmasıdır. Qarşıda bizi böyük sülh müqaviləsi gözləyir. Həmin sülh müqaviləsinə qədər nəqliyyat dəhlizləri açılacaq, iqtisadı əlaqələr qurulacaq, münasibətlərdə istiləşmə seziləcək. Lakin hamımız bilməliyik ki, istənilən sülh müqaviləsi tam şəkildə Azərbaycanın maraqlarına uyğun olacaq, çünki biz qalib tərəfik. Həmçinin, arxamızda Türkiyə kimi müttəfiqimiz, qardaş ölkə dayanıb. Hesab edirəm ki, Azərbaycan dövlətinin bu günə qədər apardığı siyasət təqdirəlayiqdir. Bundan sonra da narahatlığa əsas yoxdur”.
