"Məclis.info" saytının rəhbərinin və onunla birgə ittiham olunan şəxslərin məhkəməsi başlayıb
- 27-05-2025, 12:10
- Siyasət
“Report”un məlumatına görə, Bakı Ağır Cinayətlər Məhkəməsində keçirilən hazırlıq iclasında təqsirləndirilən şəxslərin anket məlumatları dəqiqləşdirilib.
Sonra təqsirləndirilən İmran Əliyevin vəkili məhkəməyə vəsatətlər təqdim edib.
Vəkil vəsatətlərinin birində cinayət işinə xitam verilməsini istəyib. O, vəsatəti əsaslandırarkən deyib ki, ittiham aktında cinayət işi ilə bağlı sübut yoxdur.
Müdafiəçi vəsatət təmin edilmədiyi təqdirdə müvəkkili barəsində seçilmiş həbs qətimkan tədbirinin həbslə bağlı olmayan qətimkan tədbir ilə əvəz edilməsini xahiş edib.
Məhkəmə hər iki vəsatəti təmin etməyib.
Daha sonra cinayət işinin məhkəmə baxışına verilməsi barədə qərar qəbul edilib.
Növbəti proses iyunun 10-a təyin olunub.
Qeyd edək ki, “Məclis.info” saytının rəhbəri İmran Əliyev ötən ilin aprel ayında həbs edilib.
Daha sonra cinayət işi üzrə Elgiz Qəhrəman və Tamella Musayeva da məsuliyyətə cəlb olunublar.
Onlar Cinayət Məcəlləsinin 192.2.2 (küllü miqdarda gəlir əldə etməklə qanunsuz sahibkarlıq), 192.2.3 (mütəşəkkil dəstə tərəfindən törədildikdə), 193-1.3.1 (Cinayət yolu ilə əldə edilmiş əmlakı leqallaşdırma), 193-1.3.2 (xeyli miqdarda törədildikdə), 206.4 (mütəşəkkil dəstə tərəfindən qaçaqmalçılıq), 213.2.1 (vergiləri ödəməkdən yayınma - mütəşəkkil dəstə tərəfindən törədildikdə),320.1 (sənəd saxtalaşdırma), 320.2 (saxta sənədlərdən istifadə etmə) ittiham ediliblər.
İmran Əliyevin barəsində həbs qətimkan, Elgiz Qəhrəman və Tamella Musayevanınn barəsində isə polis nəzarəti altında olma qətimkan tədbiri seçilib.
