“Bayram günü poliklinikaya yaxınlaşdım, heç kim yox idi”

Artıq bir neçə gündür ki, vətəndaşlar arasında kəskin respirator xəstəliklər artmağa başlayıb. Eyni zamanda, uşaqlarda adı bəlli olmayan virusun yayılması halları valideynlərin narahatlığına və xəstəxanalara müraciət etməsinə səbəb olub. Valideynlər övladlarından sonra özlərində də yüksək temperatur, öskürək, halsızlıq kimi simptomları müşahidə etdiklərini qeyd edirlər. Qeyd edilir ki, bayram günləri ilə əlaqədar insanlar arasında təmasın çoxalması da xəstəliyin artmasına gətirib çıxarıb.

Bayram günlərində açıqlanan koronavirus statistikasında isə yeni yoluxanların sayı əvvəlki günlərlə müqayisədə aşağı olub. Belə ki, yanvarın 1-də 364, 2-də 368, 3-də 273, 4-də isə 413 yeni yoluxma faktı qeydə alınıb. Vətəndaşlar bunu Təcili Yardımın çağırışlara cavab verməməsi və onlardan yaxma götürülməməsi ilə əlaqələndirirlər.

Paytaxt sakini Vəfa Həsənova saytımıza müraciət edərək bildirib ki, yanvarın 1-dən etibarən oğlu və gəlini yüksək temperaturdan əziyyət çəksə də, təcili yardım zənglərə cavab verməyib: "Telefonu açanda da deyirlər ki, 814-ə yığın. Həmin nömrə də ərazi üzrə poliklinikalardır. Onların da xəttinə düşmək mümkün olmadı. Hətta özüm 2 saylı poliklinikaya yaxınlaşdım. Heç kim yox idi. Axırda tanışların vasitəsilə təcili yardım yanvarın 3-ü gecə gəlib test götürdü. Oğlumdan test götürsələr də, gəlinin temperaturu həmin an 38-i keçmədiyi üçün ondan test götürmürdülər. Güc-bəla ilə test götüzdürdük. Başa düşmürük ki, əgər tanış tapmasaydıq, vəziyyətimiz necə olardı?! Gəlib bizdən test götürən olmayacaqdı".

Bayram günlərində vətəndaşların sözügedən şikayətlərinə Bakı şəhəri Təcili və Təxirəsalınmaz Tibbi Yardım Stansiyasının əməliyyat işləri üzrə baş həkimin müavini Nuridə Fərzəliyeva cavab verib. Onun sözlərinə görə, bütün bayram günlərində Bakı şəhəri Təcili və Təxirəsalınmaz Tibbi Yardım Stansiyası gücləndirilmiş iş rejimində çalışıb: "Bakı şəhəri üzrə 21 bölməmiz var və 139 briqada tam olaraq xətdə fəaliyyət göstərib. Bayram günlərində çağırışların sayında artım hiss etdik. Çalışırdıq ki, vətəndaşlara ilkin tibbi yardım göstərək. Ən çox çağırış yanvarın 2-si və 3-də oldu. Bəzən əhali elə düşünür ki, qeyri-iş günüdürsə, səhhətində yaranan problemlərlə bağlı ilk olaraq təcili yardıma üz tutmalıdır. Nəzərə almaq lazımdır ki, qeyri-iş günlərində stasionar və sahə poliklinikalarında da çağırışlar qəbul olunur. Bəzən vətəndaşlara bunu izah etdikdə onlar aqressiv cavablar verirlər.
çağırışlar qəbul olunur. Bəzən vətəndaşlara bunu izah etdikdə onlar aqressiv cavablar verirlər.

Qeyd edim ki, dislokasiya üzrə 139 briqada 1700-1800 çağırışı gecikmədən normal şəkildə həyata keçirə bilir. Çağırışların sayı bundan artıq olarsa, müəyyən gecikmələr olur. Çağırışlar 3300-ə çatdığında isə gecikmə qaçılmazdır. Bu halda müraciətlər çeşidlənərək həyata keçirilir. Müraciət edənlərdə xəstəlik səbəblərinə baxılır. İlk olaraq həyati vacib, təcili səbəbli çağırışlara gedilir. Bunlara yol-nəqliyyat hadisələri, travmalar, ürəktutmalar, hamilə qadınlar və kiçik yaşlılar və qıcolmalarla bağlı müraciətlərdir. Daha sonra isə təxirəsalınmaz çağırışları icra etməyə çalışırdıq".

N. Fərzəliyevanın sözlərinə görə, bayram günlərində hərarətlə bağlı çağırışlar da olub: "Deyə bilərik ki, bu daha çox mövsümi qriplə bağlıdır. Ancaq bu halda əhalinin Təcili Yardıma müraciət etməsi düşünürəm ki, müsbət haldır. Çünki iki ildir ki, pandemiya davam edir. Kimsə özündə bu halları görürsə, müayinə olunmaq istəməsi yaxşıdır. Ancaq deyə bilərəm ki, COVID-19-la bağlı müraciətlər demək olar azalıb. Əvvəllər daha çox ağır vəziyyətdə olanlardan müraciətlər olurdu. İndi isə çağırışlarda adi COVID simptomlarına rast gəlirik.

Temperaturu 38 dərəcədən aşağı olanlardan yaxma götürülməməsi məsələsinə gəlincə isə bildirim ki, bu, əvvəldən də belədir. Əgər vətəndaşda temperatur 38 dərəcədən yüksəkdirsə təcili yardım yaxma götürür. Temperatur bundan azdırsa, sahə üzrə poliklinikalara müraciət etmək lazımdır".