Çin Sədri: Vyetnamla birlikdə sosializmin çiçəklənməsinə kömək etməyə hazırıq
“Report” TASS-a istinadən xəbər verir ki, bunu Çin Xalq Respublikasının sədri Si Cinpin deyib.
"Mən Çin-Vyetnam münasibətlərinin inkişafına böyük əhəmiyyət verirəm və sizinlə birlikdə səyləri birləşdirməyə, sosialist modernləşmə quruculuğu yolunda əl-ələ irəliləməyə, strateji əhəmiyyətli Çin-Vyetnam birliyinin hər iki ölkənin xalqlarının xeyrinə daim yeni nəticələr verməsinə kömək etməyə hazıram", - Çin lideri ikitərəfli münasibətlərin 75 illiyi münasibətilə Vyetnam Kommunist Partiyası Mərkəzi Komitəsinin baş katibi To Lama və ölkə prezidenti Lıonq Kıonqa ünvanlandığı təbrik məktublarında qeyd edib.
S.Cinpin deyib ki, Pekin və Hanoy dünyada sosializmin çiçəklənməsinə, bəşəriyyətin inkişafına və tərəqqisinə kömək etməklə mühüm töhfə verməlidir. O, dünyada baş verən böyük dəyişiklikləri xatırladaraq bunların fonunda sosialist quruculuğunun davam etdirilməsinin vacib olduğunu bildirib.
ÇXR sədrinin sözlərinə görə, bu, regionda və dünyada sülh, sabitlik, inkişaf və çiçəklənmə üçün böyük əhəmiyyət kəsb edir.
