Malik Həsənov: Erməni təbliğatının feyklərini ifşa etmək hər kəsin vətəndaşlıq borcudur
- 9-10-2020, 10:40
- Siyasət
“Ermənistan-Azərbaycan Dağlıq Qarabağ münaqişəsinin beynəlxalq hüququn norma və prinsipləri çərçivəsində həlli üçün möhkəm hüquqi baza mövcuddur. Dağlıq Qarabağın Azərbaycanın ayrılmaz tərkib hissəsi olduğu, Ermənistan silahlı qüvvələrinin işğal olunmuş ərazilərimizdən qeyd-şərtsiz çıxarılması beynəlxalq təşkilatların, xüsusilə BMT Təhlükəsizlik Şurasının 4 qətnaməsində öz əksini tapıb. Bugünümüzün əsas çağırışlarından biri döyüş meydanı ilə yanaşı, informasiya müharibəsində də üstünlüyümüzü təmin etmək, Ermənistanın feyk xəbərlər vasitəsilə beynəlxalq ictimaiyyətin diqqətini yayındırmaq cəhdlərinin qarşısını almaq, Azərbaycanın haqq səsini dünyaya çatdırmaqdır.” ''Azad Səs'' Modern.az-a istinadən xəbər verir ki, bu fikirləri Milli Məclisin deputatı Malik Həsənov bildirib.
Millət vəkili qeyd edib ki, Azərbaycan Ordusu sentyabrın 27-də qətiyyətli əks-hücum əməliyyatlarına başlayandan ölkəmizə qarşı, xüsusilə sosial mediada əks təbliğat kampaniyasına geniş şəkildə start verilib: “Möhtərəm Prezidentimiz İlham Əliyevin son günlər “Əl-Cəzirə”, “Əl-Ərəbiyə”, “Rossiya-1”, “Pervıy kanal”, “TRT Haber”, “CNN Türk”, “Euronews” televiziya kanallarına, dünyanın digər nüfuzlu aparıcı kütləvi informasiya vasitələrinə müsahibələri Azərbaycan həqiqətlərini, Ermənistanın son təxribatlarının əsl mahiyyətini, işğalçı dövlətin rəhbərliyinin münaqişənin həlli ilə bağlı qeyri-konstruktiv mövqeyini və yeni ərazilər uğrunda müharibə planlarını, erməni təbliğat maşınının dünyaya yalan xəbərlər yaymaq cəhdlərini ifşa edərək qarşı tərəfin bugünədək problemin sülh danışıqları yolu ilə nizamlanmasında maraqlı olmadığını, havadarlarının ona dəstək verdiklərini faktlar əsasında bir daha diqqətə çatdırıb. Bu, dövlətimizin diplomatiya sahəsində böyük uğuru, qələbəsidir.”
“Azərbaycana qarşı qərəzli təbliğat uzun illərdir aparılır” söyləyən M.Həsənov vurğulayıb ki, bunu şərtləndirən əsas amillərdən biri ölkəmizin dünya miqyasında müstəqil siyasət həyata keçirməsi, bu siyasətin mərkəzində dövlətimizin, xalqımızın maraqlarının dayanmasıdır: “Bugünkü Azərbaycanın bütün istiqamətlər üzrə inkişafı göstərir ki, ölkəmiz haqq yolundadır. Azərbaycanın hazırda BMT-dən sonra ikinci böyük beynəlxalq təsisata, Qoşulmama Hərəkatına sədrlik etməsi, 120 ölkənin dəstəyini qazanması dövlətimizin qətiyyətli və ədalətə söykənən siyasətinin nəticəsidir. Azərbaycan bu gün Avropa ilə Asiya arasında həm siyasi, həm coğrafi, həm də enerji körpüsüdür. Ölkəmizin müstəqil siyasətini, davamlı uğurlarını qəbul etməyən dairələr, dövlətlər əssasız təbliğatlara üstünlük verərək, beynəlxalq aləmdə Azərbaycanın nüfuzuna xələl gətirməyə cəhd edirlər. Amma bu cəhdlər bugünkü reallıqlardan da göründüyü kimi, əsaslı faktların, tarixi həqiqətlərin qarşısında boşa çıxır. Ermənistan Azərbaycan Ordusu əks-hücum əməliyyatına başladığı gündən Türkiyənin guya bu münaqişəyə cəlb olunmasını iddia etməklə Silahlı Qüvvələrimizin uğurlarının üzərinə kölgə salmağa, məğlubiyyətlərini müxtəlif yollarla ört-basdır etməyə çalışır. Amma reallıq budur ki, Türkiyənin prosesə cəlb edilməsi yalnız münaqişədən sonrakı dövrdə siyasi nizamlanma kontekstində nəzərdə tutulur. Ermənistanın yaydığı digər feyk xəbər guya Türkiyəyə məxsus F-16 təyyarəsinin Ermənistana məxsus Su-25 təyyarəsini vurmasıdır. Məlum oldu ki, erməni pilot, sadəcə, peşəkarlıq baxımından o qədər də hazırlıqlı olmayıb və təyyarə dağa çırpılıb. İşğalçı dövlət belə yalan xəbərləri dövriyyəyə buraxmaqla beynəlxalq rəyi çaşdıracağını düşünsə də bunun mümkünsüzlüyünün fərqindədir.”
M.Həsənov dünyanın ikili siyasətinin hər bir məsələdə özünü qabarıq şəkildə büruzə verdiyini bildirib: “Ermənistanın baş naziri Nikol Paşinyanın bu günlərdə BBC kanalına müsahibəsi diqqətdən kənarda qala bilməz. Jurnalistin beynəlxalq hüququn norma və prinsiplərinə əsaslanaraq Dağlıq Qarabağ probleminin həlli ilə bağlı sualının cavabında N.Paşinyanın beynəlxalq hüququn mövcudluğunu gülüşlə qarşılaması dünyanın siyasi mənzərəsini yaratdı. Beynəlxalq hüququ inkar edən “bir rəhbər”in danışıqlar masası arxasında əyləşməsi, ən əsası ədalətli mövqe ortaya qoyması nə dərəcədə real ğörünə bilər? Dünya atəşkəsə çağırışlar edirsə, öncə bu kimi məsələlər barədə düşünməlidir.”
Millət vəkili qeyd edib ki, bu gün birliyimizə, həmrəyliyimizə, real faktlara, tarixi həqiqətlərə, beynəlxalq hüququn norma və prinsiplərinə əsaslanan təbliğatımıza söykənərək hücum diplomatiyasını davam etdirməli, erməni yalanlarına qarşı həqiqətlərimizi qoymalıyıq. Azərbaycanın Birinci vitse-prezidenti Mehriban xanım Əliyevanın “Instagram” səhifəsində “Həqiqəti Paylaş!” başlığı altında Azərbaycan xalqına çağırışı da bugünümüzün əsas tələblərini özündə ehtiva edir: “ Bu gün biz hamımız həqiqətən tarixi hadisələrin şahidləriyik! Lakin biz baş verənləri sadəcə kənardan müşahidə edə bilmərik. Bizim hər birimiz Böyük Qələbə anını yaxınlaşdırmaq üçün əlimizdən gələni etməyə borcluyuq. Deməli, biz hamımız erməni yalanını ifşa etmək üçün maksimum səy göstərməyə borclu olan əsgərlərik. Mən sizin hər birinizi erməni təbliğatının feyklərini ifşa etməyə və erməni təcavüzü haqqında həqiqətləri bütün mümkün platformalarda beynəlxalq birliyə çatdırmağa çağırıram! Azərbaycanı özünün Vətəni hesab edən hər kəs səsini ucaltmalı və ermənilərin yalanını təkzib etməlidir! Uca Tanrı bizim Ordumuzu, xalqımızı və Vətənimizi qorusun!”
