Aslan İsmayılov şirkətlə bağlı sensasion faktları açıqladı

26-09-2020, 08:15
Cəmiyyət

“Dünyanın müxtəlif bölgələrindən olan dələduzlar hər il cürbəcür yollarla azərbaycanlılardan milyonlarla pul alırlar. Tək mənə müraciət edənlərin itirdikləri pulları hesablasaq, bu, milyonlarla dollar edir. Özü də bu dələduzluq əməllərinin qurbanları həmişə tamahkarlar olur. Bəzilərinə elan gəlir ki, onun ABŞ, Kanada və yaxud digər ölkədə qohumları olub və malik olduqları milyonları ona vəsiyyət ediblər. İlkin olaraq başlayırlar ki, bu milyonları həmin şəxsin adına keçirmək üçün 100$ hansısa hesaba keçirmək lazımdır. Bundan sonra cürbəcür bəhanələrlə minlərlə dollar pul köçürülür. Özü də bu üsullar nə qədər bəsit olsa da, elə yazılarından növbəti qurbanların şəxsiyyətinə uyğun olaraq bəhanələr uydurulur. Son dövrlər insanlar onlarla guya fantastik gəlir gətirən firmalara üzv olub milyonlar qazanmaq şansının olduğunu bildirib”.

''Azad Səs'' Pravda.az-a istinadən xəbər verir ki, bunu hüquqşünas Aslan İsmayılov deyib.

A.İsmayılov bildirib ki, axır vaxtlar belə qəbildən “KROV1” şirkəti peyda olub: “Bunların adları və fəaliyyətləri cürbəcür olsa da, niyyətləri Bakıda illər əvvəl insanları müflis etmiş MUNCUQ əməliyyatının oxşarıdır. Ən dəhşətlisi də odur ki, bu dələduzluğun qurbanı əsasən çox da varlı olmayan şəxslərdir və bir çoxları əmlaklarını girov qoyub borca pul götürüb bədbəxt olurlar. Buradan bir daha vətəndaşlarımıza müraciət edirəm, belə fırıldaqlara inanmayın, asan qazanc dalınca qaçıb özünüzü bədbəxt etməyin. Əmin olmadığınız, yoxlamadığınız, biznesi idarə edən şəxsləri fiziki görmədiyiniz halda heç bir iş qurmağa çalışmayın.Burada uzun illər əvvəl olmuş bir hadisəni də Sizinlə bölüşüm. Yaxın bir qohumum 90-cı illər evimizə gəlib mənə pul qazandırmaq yolunu anlatmaq istədi. Danışıqdan anladım ki, söhbət “Vahidbank” adlı bir müəssisədən gedir. O vaxtlar bu bank fəaliyyətinə təzəcə başladığından tanınmırdı və qohum 3 ay dalbadal qoyduğu pula hər ay 20% gəlir götürmüşdü. Nəyin necə olduğunu bilməsəm də, qohuma təcili pulunu götürməyi təklif etdim. Qohum məni fərsizlikdə ittiham edib idarə etdiyi Zaporojets maşınını da satıb banka qoydu və az sonra müflis oldu. Həmin illər hətta yaşadıqları evlərini də itirən çoxlu sayda insanlar oldu. Bundan sonra onlarla belə hallar olsa da insanlarımız yenə da tamahlarının qurbanları olurlar”.