Şimali Kipr rəsmisi: İslamofobiyanın kökündə dayanan səbəblərdən biri Avropada müsəlmanların sosial çağırışlar etməsidir

İslamofobiyanın kökündə dayanan səbəblərdən biri Avropaya işləməyə gedən müsəlmanların sosial çağırışlar səsləndirməsidir.

“Report” xəbər verir ki, bunu Şimali Kipr Prezidentinin Beynəlxalq əlaqələr və diplomatiya üzrə xüsusi müşaviri Hüseyn Işıksal Bakıda “Avropada antimusəlman qanunvericiliyinin institusionallaşması. Radikallaşma fonunda antimüsəlman ritorikası və yayılmış islamofobik əhval-ruhiyyə” mövzulu panel sessiyada deyib.

O qeyd edib ki, Avropaya gedən müsəlmanlar da təbii olaraq digərləri kimi normal həyat standartları, iş imkanları tələb edirdilər:

“Çünki əsasən ağır işlərə müsəlmanlar cəlb edilib. Müsəlmanların bu çağırışları isə avropalıları narahat edib. Biz (Şimali Kipr-red.) bu gün belə müsəlman və türk olduğumuz üçün qeyri-insani embarqolara məruz qalırıq. Halbuki ölkəmiz müasir dövlətin bütün atributlarına malikdir, ancaq ayrı-seçkiliklə üzləşirik. Bizim 20 ölkədə nümayəndəlik ofisimiz var. Yaxın illərdə konsulluqlarımızın da sayı artırılacaq. Bunları nəzərə almaq lazımdır”.

Qeyd edək ki, bu gün Bakıda “İslamofobiya diqqət mərkəzində: Qərəzin ifşası, stiqmaların dağıdılması” mövzusunda beynəlxalq elmi konfransın ikinci günü öz işinə başlayıb. Bakı Beynəlxalq Multikulturalizm Mərkəzi, Beynəlxalq Münasibətlərin Təhlili Mərkəzinin təşkilatçılığı ilə keçirilən tədbir İslamofobiya ilə Beynəlxalq Mübarizə Gününün üçüncü ildönümünə həsr olunub.

Konfrans islamofobiyanı doğuran qlobal, tarixi və siyasi amilləri araşdırmaq üçün mütəxəssisləri, akademikləri və dövlət rəsmilərini bir araya gətirib.

Son iki ildə Bakı Beynəlxalq Multikulturalizm Mərkəzi və Beynəlxalq Münasibətlərin Təhlili Mərkəzi G20 Dinlərarası Forumla əməkdaşlıq çərçivəsində ardıcıl olaraq islamofobiyaya həsr olunmuş beynəlxalq konfranslar təşkil edib. Bu konfransların məqsədi islamofobiyanın bütün formalarına və təzahürlərinə qarşı mübarizə səylərinə töhfə vermək olub.

Konfranslar çərçivəsində iştirakçılar islamofobiya ilə mübarizənin müxtəlif aspektlərini, o cümlədən kəsişən yanaşmanın vacibliyini, islamofobiyanın tarixi və müasir baxış bucaqlarını, birgə əməkdaşlığın təşviqini və mübarizədə beynəlxalq təşkilatların rolunu müzakirə ediblər. Bundan başqa, dini müxtəlifliyin və dinlərarası hörmətin təşviqinə dair müzakirələr də aparılıb.